Ուղեցույցներ · Հաշիվներ և գումարի վերադարձ

Ինչպես ստանալ մանրամասն բժշկական հաշիվ և ստուգել այն

Հեղինակ՝ Ռեզա Քուվեյթի · 2026 թ. հոկտեմբերի 29

Ամփոփ հաշիվը ցույց է տալիս միայն մեկ մեծ գումար։ Մանրամասն հաշիվը (itemized bill) ցույց է տալիս յուրաքանչյուր գանձում, և հենց այնտեղ են երևում սխալները։ Ահա թե ինչպես այն խնդրել և ինչ ստուգել։

1. Հավաքեք Ձեր ունեցած փաստաթղթերը

• Հիվանդանոցի, բժշկի կամ լաբորատորիայի հաշիվը՝ հաշվի համարով և ծառայությունների ամսաթվերով
• Եթե ապահովագրություն ունեք՝ նույն այցի համար Ձեր ապահովագրական ծրագրից ստացված Explanation of Benefits (EOB) փաստաթուղթը (ծածկույթի բացատրագիր)։ Այն հաշիվ չէ, բայց ցույց է տալիս, թե ըստ ապահովագրական ծրագրի որքան պետք է վճարեք։
• Ձեր սեփական նշումները՝ երբ եք եկել և հեռացել, և ինչ հետազոտություններ կամ բուժում եք հիշում

Եթե ապահովագրություն ունեք, և EOB-ն դեռ չի եկել, սպասեք դրան, նախքան վճարելը։

2. Խնդրեք մանրամասն հաշիվը գրավոր

Օգտագործեք պացիենտի պորտալի հաղորդագրությունների բաժինը կամ հաշիվների բաժնի էլ. փոստը կամ փոստային հասցեն և պահեք պատճենը․

Այս հաղորդագրությունն անգլերենով է, քանի որ այն ուղարկվում է ամերիկյան ընկերության։ Լրացրեք [քառակուսի փակագծերում] նշված տեղերը։

Hello,

I'm reviewing my bill for account [number], for services on [date(s)] for [patient name].

Please send me a fully itemized bill showing each charge, the date, the billing code, the quantity and the amount, plus all payments and adjustments from insurance.

Please also send your financial assistance (discount payment and charity care) policy and application. While I review the bill, please don't send the account to collections.

Thank you,
[Your name]
[Phone or email]

3. Ստուգեք տող առ տող

• Կրկնություններ՝ նույն հետազոտությունը, դեղը կամ պարագան նույն օրն երկու անգամ է գանձվել
• Ծառայություններ, որոնք չեք ստացել՝ հետազոտություն, որը նշանակվել, ապա չեղարկվել է, կամ այց, որը չի կայացել
• Սխալ ամսաթվեր կամ քանակներ՝ պալատում ավելորդ օրեր կամ գանձումներ տուն գնալուց հետո
• Ապահովագրությունը կիրառված չէ՝ Ձեր EOB-ում նշված վճարումներ և ճշգրտումներ, որոնք հաշվում չկան
• Ձեր տվյալները՝ Ձեր անունը, ծննդյան ամսաթիվը և ապահովագրական ID-ն ճիշտ են։ Տառասխալի պատճառով ապահովագրական պահանջը կարող է մերժվել։

Եթե ինչ-որ բան ճիշտ չի թվում, պատասխան գրեք՝ նշելով տողը, ամսաթիվը և գումարը, և խնդրեք ուղղված հաշիվ։ Եթե գանձումն ապահովագրությանը ներկայացվել է տառասխալով, խնդրեք հաշիվների բաժնին ուղղել այն և կրկին ներկայացնել պահանջը։

4. Կալիֆոռնիայում հարցրեք հիվանդանոցի ֆինանսական օգնության մասին

Կալիֆոռնիայի հիվանդանոցները պարտավոր են զեղչված վճարում կամ բարեգործական բուժօգնություն (charity care) առաջարկել այն պացիենտներին, ովքեր ապահովագրություն չունեն կամ ունեն մեծ բժշկական ծախսեր, և որոնց ընտանեկան եկամուտը չի գերազանցում դաշնային աղքատության շեմի 400 տոկոսը։ Կարող եք դիմել ցանկացած ժամանակ, նույնիսկ այն բանից հետո, երբ հաշիվը փոխանցվել է պարտքերի հավաքագրման (collections)։ Եթե պարզվի, որ Դուք այդ օգնության իրավունքն ունեք, և արդեն ավել եք վճարել, հիվանդանոցը պետք է 30 օրվա ընթացքում վերադարձնի տարբերությունը։ Այս կանոնները վերաբերում են հիվանդանոցներին։ Բժիշկների կամ լաբորատորիաների առանձին հաշիվների համար կարող են գործել այլ կանոններ, ուստի յուրաքանչյուրին հարցրեք իր կանոնների մասին։

Եթե հիվանդանոցն անհիմն մերժել է Ձեր դիմումը կամ Ձեզ չի տեղեկացրել իր ծրագրերի մասին, կարող եք բողոք ներկայացնել նահանգային Hospital Bill Complaint Program ծրագրին։ Այն հաշիվների վերաբերյալ ընդհանուր վեճերով չի զբաղվում։

5. Վարկային հաշվետվություններ և ապահովագրություն

• Վարկային հաշվետվություններ՝ Կալիֆոռնիայում բժշկական պարտքը չի կարող նշվել Ձեր վարկային հաշվետվությունում (2025 թ. հունվարի 1-ից)։ Եթե այն տեսնեք, տեղեկացրեք բուժհաստատությանը, պարտքի ներկայիս տիրոջը և վարկային բյուրոյին։ Կարող եք այդ մասին հայտնել նաև California Department of Justice գերատեսչությանը։
• Ապահովագրական մերժումներ՝ եթե Ձեր ապահովագրական ծրագիրը հրաժարվել է վճարել, հարցը լուծվում է հենց այդ ծրագրի բողոքարկման կարգով։ Կալիֆոռնիայի շատ ապահովագրական ծրագրերի դեպքում DMHC Help Center կենտրոնը (1-888-466-2219) անվճար օգնություն է տրամադրում։

6. Պահեք պարզ գրառումներ

Պահեք յուրաքանչյուր հաշիվ, EOB, նամակ և պատասխան, և գրի առեք յուրաքանչյուր զանգի կամ հաղորդագրության ամսաթիվը և բոլոր այն մարդկանց անունները, որոնց հետ գործ եք ունեցել։ Հաշիվն ուղղվելուց հետո վճարեք միայն այն գումարը, որի հետ համաձայն եք, և պահեք անդորրագիրը։

Միայն ընդհանուր տեղեկատվություն, ոչ իրավական կամ ֆինանսական խորհրդատվություն։ Յուրաքանչյուր ընկերություն և քարտը թողարկած բանկ ունի իր կանոնները։